Pro-Vice-Chancellor's Welcome

Te Mihi o te Manukura

Nau mai, haere mai ki te Wāhanga Matua Mātau Hauora o te Whare Wānanga o Otākou.  Ko tō mātou nei whakatakanga hei whakatipu i te hunga mahi hauora matatau rawa ki ngā iwi o Aotearoa me te Wai Pounamu.  Kia tae hoki tā mātou mahi rangahau, tā mātou mahi whakaako, tā mātou mahi pūkenga hoki ki te tino taumata kia hāpaitia aua mahi ki te motu nei, ki te ao whānui hoki.

Ko te Kaupeka Whaiora, te Kaupeka Pūniho, te Kura Mātauranga Wai-Whakaora me te Kura Kōmiri Pai te whānau o te Wāhanga Matua Mātau Hauora.

Kei roto i ngā kaupapa whakaako me ngā kaupapa ako
o ēnei Kura, o ēnei Kaupeka ka kitea te whānuitanga o
ngā tohu.  Mā ēnei tohu ka taea te uru ki ngā umanga maha e pā ana ki te whaiora, ki te pūniho, ki te wai-whakaora, ki te kōmiri me te mahi kei roto i ngā taiwhanga whaiora.

He kaupapa anō tō te Wāhanga Matua nei e pā ana ki te whaiora hihi iratuki, ki te hangarau pūniho, ki te hauora waha me te whaiora koiora.

Ki te hiahia koe ki te ako i tō mātou nei taha, kia mōhio ai koe he matatau rawa ngā kaiako e tū ana ki te mata o te kārehu o te mātauranga, e mōhiotia whānuitia ki te ao.

Ko te mahi kei roto i ngā taiwhanga he wāhanga nui o ngā kaupapa katoa e whakaano e mātou, kia kapo ai koe i ngā tohungatanga hei ārahi i a koe i te umanga  whaihua hei kaimahi whaiora.

Ka whakanuitia whānuitia ngā tāura o te Wāhanga Matua Mātau Hauora o te Whare Wānanga o Otākou, mō ō rātou pūkengatanga, me te pai o ā rātou mahi whaikiko, rangahau hoki.

I tua atu i ngā kaupapa tauira paetahi, ka taea hoki te mahi i ngā kaupapa tāura, i ngā kaupapa rangahau hoki e whakaārahi ai i te tauira ki te Tohu Paerua me te Tohu Kairangi, me ērā atu o ngā tohu e pā ana ki te mahi whaiora, hauora hoki.

He mahi kiko ki a mātou te mahi rangahau, ā, mōhiotia whānuitia ana ō mātou nei kairangahau mō te mahi auaha.  Mahitahi ai te Wāhanga ki ētahi atu o ngā tari o te Whare Wānanga nei, o ētahi atu whare wānanga, rōpū rangahu hoki o te motu nei, o te ao whānui hoki.

Nā reira, ahakoa kātahi anō koe ka tīmata i tō mahi hei kaitiaki hauora, ka kimi rānei koe i te ārahi hei whakapakari i ō pūkengatanga, ko tēnei te wāhi tika mōu, ā, ka komihi atu mātou ki a koe.

Ko te tūmanako, he pārekareka tō toro mai ki te taunga ipurangi nei.  Tono mai ki a mātou mehemea ka hiahia koe i te mōhiotanga i tua atu i ēnei kōrero e kōrerotia nei.

Ahorangi Peter Crampton
Te Manukura
Te Wāhanga Matua Mātau Hauora
Te Whare Wānanga o Otākou